Verndarsvæði geta haft mjög jákvæð áhrif á byggðaþróun ef rétt er að farið. Á ráðstefnunni munu erlendir fyrirlesarar segja frá áhugaverðum fordæmum frá heimalöndum sínum og fjölbreyttum leiðum sem farnar eru í þessum efnum.

Víða erlendis ná verndarsvæði yfir byggðir og staði þar sem margvísleg starfsemi fer fram. Með því að nálgast samspil verndar og nýtingar með jafnvægi og sjálfbærni að leiðarljósi má finna áhugaverðar lausnir sem tryggja vernd samhliða hagnýtingu náttúrugæða og menningararfs, sem beint eða óbeint tengist hinu verndaða.

Ráðstefnunni er ætlað að vera innlegg í opinbera umræðu sem alltof oft snýst um byggðaþróun eða verndaraðgerðir en sjaldnast hvort tveggja í senn.

Það er von aðstandenda ráðstefnunnar að hún geti fært sveitarstjórnarfólki, starfsfólki í annarri stjórnsýslu, náttúruverndarsamtökum og öllum almenningi góðar ábendingar og hugmyndir um leiðir sem fara mætti á Íslandi.

​